کابل، افغانستان – د امریکا نړیوالې پراختیايي ادارې(USAID) او د ملګرو ملتونو د کډوالۍ نړیوالې ادارې (IOM) د انسان قاچاق سره د مبارزې لپاره د افغانستان حکومت د محافظتي کړنو پیاوړي کولو په موخه د ارجاع ملي میکانیزم او انټرنټ محوره ډیټابیس په لاره واچاوو.

د دغه میکانیزم پرانیستو په موخه رامنځته شوي غونډې کې د انسان قاچاق سره د مبارزې لوی کمیسیون چارواکو، د قاچاق برخه کې د فعالو ملي او نړیوالو نادولتي بنسټونو، د ملګرو ملتونو ادارو، د نورو نړیوالو ادارو، او د رسنیو استازو ګډون کړی وو.

د افغانستان حکومت د عدلیې وزیر او د انسان قاچاق سره د مبارزې لوی کمیسیون رئیس ډاکټر عبدالبصیر انور د یادې غونډې په لړ کې وویل «د انسان قاچاق پر وړاندې د مبارزې قانون د توشیح او د ارجاع ملي میکانیزم د وروستۍ کیدو او د زیانمنو کسانو لپاره د انټرنټ محوره ډیټابیس رامنځته کیدو سره مو د انسان قاچاق پیښو ته په هر اړخیزه توګه رسیدګۍ لپاره یو غوره بنسټ رامنځته کړی دی. هیله کوم چې دغه میکانیزم د انسان قاچاق قربانیانو سره مرسته وکړي چې اړینو خدمتونو ته لاس‌رسی ومومي.» ډاکټر عبدالبصیر انور ټینګار وکړ چې په افغانستان کې د انسان قاچاق قربانیانو سره د مرستې او د قاچاقبرانو د عدلي تعقیب لپاره د ټولو شریکو غاړو ګډ کار اړین دی.

د دغې پرانیست غونډې ګډونوالو په دي اړه چې په افغانستان کې د اقتصادي وجې محرومو ټولنو ښځینه، نارینه او ماشومان د انسان قاچاق پدیدې لوی خطر سره مخامخ دي مالومات ترلاسه کړل. د امریکا نړیوالې پراختیايي ادارې سرپرستې مرستیالې اغلې الزابت چمبرس په دي اړه وویل «د انسان قاچاق زموږ د ټولنو تر ټولو زیانمنونکي وګړي، په خاصه توګه ښځې او ځوانان اغیزمن کوي. د امریکا متحده ایالاتو حکومت به د دغو ناوړو پدیدو پر وړاندې د مبارزې برخه کې چې د قانون حاکمیت، نړیوال اقتصاد، د جندر برابری او نړیوال امنیت زیانمن‌وي، د افغانستان ولس سره خپل مرستو ته دوام ورکړي.»

په افغانستان کې د یو مرکزي ډیټابیس او ارجاع میکانیزم نشتون له امله، د انسان قاچاق سره د مبارزې شریکې غاړي نشي کولای چې په اغیزمنه توګه د قاچاق قربانیان وپیژني او ورسره مرسته وکړي. په افغانستان د کډوالۍ نړیوالې ادارې رئیس او ځانګړي استازي ښاغلي لورینس حارت په دي اړه وویل «د ارجاع ملي میکانیزم او انټرنټ محوره ډیتابیس د افغانستان حکومت سره مرسته کوي چې د خپل محافظتي کړنې پیاوړي کړي ترڅو د انسان قاچاق پر وړاندې د مبارزې نوی قانون په اغیزمنه توګه پلي کړي.»

د ۲۰۰۲ کال راهیسې په افغانستان کې پراختیایې پروګرامونو باندې د ۱۷ میلیاردو ډالرو څخه ډیرو پیسو لګولو سره، د امریکا نړیواله پراختیایي اداره افغانستان ته د ټولو څخه لوی دوه اړخیزه ملکي مرستندویه پروګرام وړاندي کوي. د امریکا نړیواله پراختیایي اداره د افغانستان حکومت او ولس سره ملګترتیا کوي ترڅو د هیواد خصوصي سکتور په مشري اقتصادي وده تضمین، یو دیموکراتیک او ځواکمن دولت چې د قانون حاکمیت له لوري حکومت وکړي رامنځته، او ټولو افغانانو ته لمړني روغتیایي او پوهنیز خدمتونه چمتو کړي.