• សូមគោរព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជា​អនុប្រធាន​អចិន្ត្រៃយ៍នៃគណៈកម្មការជាតិប្រយុទ្ធប្រឆាំងការជួញដូរមនុស្ស
•  សូមគោរព លោកជំទាវ ស្រី គឹមឆយ អភិបាលរង ខេត្តកំពង់ចាម
• សូមគោរព លោក Peter Williams តំណាងអង្គការ IJM
• សូមគោរពសមាជិកទាំងអស់នៃគណៈកម្មការខេត្តប្រយុទ្ធប្រឆាំងការជួញដូរមនុស្ស
• សូមគោរពភ្ញៀវកិត្តិយសជាទីមេត្រី!

ខ្ញុំពិតជាមានសេចក្តីសោមនស្សរីករាយដោយបានចូលរួមជាមួយលោកជំទាវ ឯកឧត្តម លោក លោកស្រីទាំងអស់ ក្នុងអង្គសិក្ខាសាលាដ៏មានសារៈសំខាន់នាថ្ងៃនេះ។ អង្គសិក្ខាសាលានេះតំណាងឲ្យ​ឱកាស​តែមួយគត់សម្រាប់ឲ្យយើងទាំងអស់គ្នាធ្វើការពិភាក្សាអំពីជោគជ័យ និងការប្រឈមនានាដែលយើង​កំពុង​តែបន្តជួបប្រទះក្នុងកិច្ចការងារប្រយុទ្ធប្រឆាំងការជួញដូរមនុស្ស។ ខ្ញុំសូមសម្តែងនូវការដឹងគុណ​ចំពោះ​ លោក​​​​​ជំទាវ​ ជូ ប៊ុនអេង ដែលអញ្ជើញពីគណៈកម្មការជាតិប្រយុទ្ធប្រឆាំងការជួញដូរមនុស្ស និង ​លោកជំទាវ ស្រី គឹមឆយ អភិបាលរង ខេត្តកំពង់ចាម ដែលបានអនុញ្ញាតអោយអង្គសិក្ខាសាលានេះ​លេច​ចេញជារូបរាង​ឡើង​នៅក្នុងទឹកដីខេត្តកំពង់ចាម។​ ខេត្តកំពង់ចាម គឺជាប្រភពគន្លឹះនៃការជួញដូរមនុស្ស​សម្រាប់ធ្វើ​ទេសន្តរ​ប្រវេសន៍ដោយគ្មានសុវត្ថិភាព និងការជួញដូរកម្លាំងពលកម្ម។ ឆ្លៀតក្នុងឱកាសនេះ ខ្ញុំ​សូម​ថ្លែងអំណរ​គុណ​​ដល់អង្គការ Winrock អន្តរជាតិ និងអង្គការ IJM ចំពោះកិច្ចខិតខំប្រឹងប្រែងលើ​កិច្ចការងារ​នេះ។ យើង​ទាំង​អស់គ្នាមានមោទនភាពចំពោះការងារដែលយើងធ្វើ ដើម្បីបង្ការ ការពារ និង​ការ​ផ្តន្ទាទោស​នូវ​ឧក្រិដ្ឋ​កម្ម​ឆ្ល​ងដែនដ៏ធ្ងន់ធ្ងរនេះ។

ការជួញដូរមនុស្ស គឺជាការប្រឈមសកលមួយផ្នែកសិទ្ធិមនុស្ស ។ វាប៉ះពាល់ដល់ជនងាយរង​គ្រោះ វាធ្វើឲ្យខូចខាតដល់នីតិរដ្ឋ និងខូចដល់ពាណិជ្ជកម្មសកល។ ប្រហែលជាពុំមានការប្រឈមណាធំជាង​ឧក្រិដ្ឋ​កម្មជួញដូរមនុស្សឆ្លងដែន ដែលជះឥទ្ធិពលលើមនុស្សរាប់លាននាក់ជារៀងរាល់ឆ្នាំនៅលើ​សកល​លោក​​នោះទេ ដែលក្នុងនោះក៏មានប្រទេសកម្ពុជាដែរ។

រដ្ឋាភិបាលសហរដ្ឋអាមេរិកយកចិត្តទុកដាក់យ៉ាងខ្លាំងអំពីការប្រយុទ្ធប្រឆាំងការជួញដូរមនុស្ស ដោយ​សារ​ថាវាមិនត្រឹមតែប៉ះពាល់ចំពោះបុគ្គលរងគ្រោះ និងក្រុមគ្រួសាររបស់គេប៉ុណ្ណោះទេ ប៉ុន្តែវាក៏​ប៉ះពាល់ដល់​សហគមន៍របស់ពួកគេ ក៏ដូចជាប្រទេសទាំងមូល ដោយមិនខ្វល់អំពីទីតាំង និងកម្រិតនៃការអភិវឌ្ឍសេដ្ឋ​កិច្ចនោះឡើយ។ តាមរយៈបទពិសោធន៍ពីជុំវិញពិភពលោក កិច្ចសហការរឹងមាំរវាងរដ្ឋាភិបាល អង្គការ​សង្គមស៊ីវិល និងវិស័យឯកជន គឺមានសារៈសំខាន់ក្នុងការទប់ស្កាត់ការជួញដូរមនុស្ស។ រាជរដ្ឋាភិបាល​កម្ពុជាក៏មានសេចក្តីព្រួយបារម្ភដូចសហរដ្ឋអាមេរិកដែរ ហើយគណៈកម្មការជាតិប្រយុទ្ធប្រឆាំងការជួញដូរ​មនុស្សបានបង្ហាញនូវភាពជាអ្នកដឹកនាំ និងកិច្ចសហការចាំបាច់នានា ដើម្បីកសាងនូវវឌ្ឍនភាពពិត​ប្រាកដ​ក្នុង​ការប្រយុទ្ធប្រឆាំងការជួញដូរមនុស្សុ។

រដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID) និងទីភ្នាក់ងារដ៏ទៃផ្សេងទៀត គឺជាអ្នកផ្តល់ជំនួយធំមួយក្នុងការប្រយុទ្ធប្រឆាំងការជួញដូរមនុស្ស។ ចន្លោះឆ្នាំ ២០០១ ដល់ ២០១០ ទីភ្នាក់ងារ USAID បានចំណាយថវិកាប្រមាណ ១៦៣លានដុល្លារ នៅបណ្តាប្រទេស​ចំនួន ៦៣ ដើម្បីប្រយុទ្ធប្រឆាំងការជួញដូរមនុស្ស។ យើងគាំទ្រចំពោះសសរស្តម្ភជាយុទ្ធសាស្ត្រាទាំងបួននៃការ​ឆ្លើយតបចំពោះការជួញដូរមនុស្សដែលក្នុងនោះរួមមាន៖ ការបង្ការ ការការពារ ការផ្តន្ទាទោស និងភាពជាដៃគូ។ នៅប្រទេសកម្ពុជា ទីភ្នាក់ងារ​ USAID បានគាំទ្រចំពោះការប្រយុទ្ធប្រឆាំងការជួញដូរមនុស្សអស់រយៈកាលជាង​មួយទស្សវត្សមកហើយ។ ក្នុងខែ តុលា ឆ្នាំ២០១៥ យើងបានប្រគល់គម្រោងប្រយុទ្ធប្រឆាំងការជួញដូរមនុស្ស​នៅ​​កម្ពុជាសម្រាប់រយៈពេលបួនឆ្នាំទៅឲ្យអង្គការ Winrock អន្តរជាតិ។ គម្រោងនេះមានគោលបំណង​ដោះស្រាយបញ្ហាជាឬសគល់នៃការជួញដូរមនុស្ស។ គម្រោងនេះការពារ និងជួយដល់ជនដែលរងគ្រោះដោយ​អំពើជួញដូរ ពង្រឹងរចនាសម្ព័ន្ធអភិបាលកិច្ចមូលដ្ឋាន ដើម្បីដោះស្រាយនូវឧក្រិដ្ឋកម្មទាំងនេះ ព្រមទាំងជម្រុញ​ការផ្តន្ទាទោស។ យើងខ្ញុំសង្ឈឹមថា ជីវភាពប្រសើរឡើងនៅក្នុងស្រុក នឹងជួយទប់ស្កាត់ពួកគេពីការធ្វើដំណើរទៅ​ទីឆ្ងាយ និងធ្លាក់ចូលក្នុងកន្លែងគ្រោះថ្នាក់ ដើម្បីចិញ្ចឹមគ្រួសាររបស់ពួកគេ។

ថ្ងៃនេះ យើងដោះស្រាយបញ្ហានៃការជួញដូរមនុស្សក្នុងខេត្តកំពង់ចាម តាមរយៈការពង្រឹងកិច្ចសហការ ការចែករំលែកបទពិធន៍ និងការស្វែងរកមធ្យោបាយខុសៗគ្នាដើម្បីប្រយុទ្ធនឹងបញ្ហាដែលយើងកំពុងជួបប្រទះ។ ក្នុងខែ មិថុនា ឆ្នាំនេះ លោកស្រីនាយិកាបេសកកម្មនៃទីភ្នាក់ងារ USAID បានចូលរួមជាមួយ លោកជំទាវ ជូ ប៊ុនអេង ដើម្បីអបអរសាទរដល់គ្រូបង្វឹកនគរបាលដែលបានបញ្ចប់វគ្គបណ្តុះបណ្តាលមួយដែលសហការ​រៀបចំដោយអង្គការ IJM និងបណ្ឌិតសភានគរបាលកម្ពុជា។ គ្រូបង្វឹកនគរបាលទាំងនោះបានមានឱកាសក្នុង​ការសិក្សាពីវិធីសាស្ត្រទាញយកភស្តុតាងពីសាក្សី ជនរងគ្រោះ និងជនសង្ស័យ។ ទាំងនេះ គឺជាជំនាញដែល​អនុញ្ញាតឲ្យពួកគេកំណត់អត្តសញ្ញាណ និងផ្តន្ទាទោសអ្នកជួញដូរមនុស្ស។

ជាទីបញ្ចប់ ខ្ញុំសូមកោតសរសើរជាថ្មីម្តងទៀតនូវវឌ្ឍនភាពដែលរាជរដ្ឋាភិបាលកម្ពុជា និងដៃគូរបស់ខ្លួន​សម្រេចបានក្នុងការប្រយុទ្ធប្រឆាំងការជួញដូរមនុស្សក្នុងគ្រប់រូបភាព។ ដូចដែលលោកជំទាវ ឯកឧត្តម អស់​លោក-លោកស្រីភាគច្រើនបានជ្រាបហើយថា ក្នុងឆ្នាំនេះ ប្រទេសកម្ពុជានៅតែរក្សាចំណាត់ថ្នាក់ទី២របស់ខ្លួន​នៅ​ក្នុង​​របាយការណ៍​ប្រចាំឆ្នាំស្តីពី​ការ​ប្រយុទ្ធ​ប្រឆាំង​នឹង​ការ​ជួញដូរ​មនុស្សរបស់ក្រសួងការបរទេសអាមេរិក មាន​ន័យថាប្រទេសកម្ពុជាបានបង្ហាញនូវកិច្ចខិតខំប្រឹងប្រែងគួរឲ្យកត់សម្គាល់ ស្របតាមស្តង់ដាអប្បបរិមានៃការ​ប្រយុទ្ធប្រឆាំងការជួញដូរមនុស្ស។ យើងខ្ញុំមានការប្តេជ្ញាចិត្តក្នុងការបំពេញការងារយ៉ាងជិតស្និទ្ធជាមួយ​រាជ​រដ្ឋាភិបាលលើកិច្ចការប្រឈមដ៏សំខាន់នេះក្នុងពេលខាងមុខ។ យើងសង្ឈឹមថា នៅថ្ងៃណាមួយប្រជា​ជនកម្ពុជាអាចធ្វើទេសន្តរប្រវេសន៍ទៅរកការងារធ្វើដែលប្រសើរជាងមុនប្រកបដោយសុវត្ថិភាព និងស្រប​ច្បាប់ ហើយអាចបំពេញការងារ និងរស់នៅដោយពុំមានការភ័យខ្លាចដោយអំពើជួញដូរ។

សូមអរគុណ!